وسىدان بىرنەشە اپتا بۇرىن، ناقتى ايتقاندا 25 قازان كۇنى  بايكال جاعالاۋىنداعى اسكەري بولىمشەلەرىنىڭ بىرىندە وفيسەرمەن قوسا، جەتى ساربازدىڭ وققا ۇشقانى  حابارلانعانى بەلگىلى. بۇل تۋرالى   Qamshy.kz اقپارات اگەنتتىگى URA.RU پورتالىنا سىلتەمە جاساپ، حابارلايدى.

قاتارداعى سارباز راميل شامسۋتدينوۆ ءوزىن ازاپتاپ، قورلاعانى ءۇشىن قاراۋىلدا تۇرعان كەزىندە قولىندا اۆتوماتتىڭ بارىن پايدالانىپ، ءوزىن ۇرىپ-سوعىپ جۇرگەن ساربازدارعا وق اتقان. ەكى سارباز جارالانىپ، التاۋى سول زاماتتا جان تاپسىرعان. ونىڭ ىشىندە ءبىر وفيسەر بار.

 رەسەي قوعامىندا ۇلكەن قوعامدىق پىكىر تۋدىرعان وقىس وقيعادان كەيىن اسكەري بولىمشەدە تەكسەرىس جۇمىستارى باستالىپ كەتتى. ال قاتارداعى جاۋىنگەر راميل شامسۋتدينوۆتىڭ ساربازداردى قىرىپ سالۋىنا نە سەبەپ بولعان؟ ول ءوز ارىپتەستەرىن نەگە ءولتىردى؟ راۆيل شامسۋتدينوۆتىڭ ايتۋىنا قاراعاندا، وسى ۋاقىتقا دەيىن ونى ۇرىپ، سوعىپ كەلگەن. ءتىپتى ونىڭ باسىن ۋنيتازعا تىعىپ، قورلاعان دا كورىنەدى. باستى سەبەپ –اسكەردەگى الىمجەتتىك. ۇنەمى بولىپ تۇراتىن قورلىق پەن زورلىقتان قاتارداعى جاۋىنگەردىڭ جۇيكەسى سىر بەرگەن بولۋى كەرەك.

چيتا قالاسىنىڭ ماڭىنداعى اسكەري بولىمشەگە ءراۆيلدىڭ اكەسى دە بارىپ قايتقان. ونىڭ ايتۋىنا قاراعاندا، شىن مانىندە قول جۇمساۋ دەرەگى ورىن العان. ونى سارباز راميل شامسۋتدينوۆ تە راستاپ وتىر. قاتارداعى ساربازدارعا وق اتارىنان بىرنەشە ساعات بۇرىن راميل اكەسىنە ۇيالى تەلەفون ارقىلى «اكە، مەن ودان ارى شىداي المايمىن» دەپ حابارلاما دا جىبەرگەن كورىنەدى. اقىرى ءىس وسىلاي ناسىرعا شاپتى. ورىن العان توتەنشە جاعدايدان كەيىن راميل اسكەريلەرگە ءوز ەركىمەن بەرىلگەن.

ءقازىر وقىس وقيعاعا قاتىستى كەڭ كولەمدە تەكسەرۋ، زەرتتەۋ جۇمىستارى جۇرگىزىلۋدە. اسكەردەگى ساربازداردان سوققى الىپ، ساعى سىنعان سارباز راميل شامسۋتدينوۆتىڭ جايى شەشەنستان پرەزيدەنتىن دە الاڭداتپاي قويمادى.  ول كەشە «زارداپ شەككەن مۇسىلمان بالاسىنىڭ قۇقىن قورعاۋىمىز كەرەك» دەپ ەكى شەشەن قورعاۋشىسىن چيتاعا جىبەردى. قورعاۋشىلار  سايد-ماگومەد چاپانوۆ پەن راۆيل تۋگۋشيەۆ كەشە ماسكەۋ ارقىلى چيتاعا قاراي ۇشىپ شىققان. الداعى ۋاقىتتا بولاتىن سوت وتىرىسىندا ەكى شەشەن قورعاۋشىسى ەندى تاتار بالاسى  راميل شامسۋتدينوۆتىڭ قۇقىن قورعاماق.